अल्फा इव्हेंटसतर्फे ‘बैठक’ मालिकेअंतर्गत
पंडित अमरेंद्र धनेश्वर आणि डॉ. राधिका जोशी यांची शनिवारी मैफल !
पुणे : अल्फा इव्हेंटसतर्फे शास्त्रीय संगीतावर आधारित ‘बैठक’ या सांगीतिक मालिकेतील पहिले पुष्प ग्वाल्हेर घराण्याचे ज्येष्ठ गायक पंडित अमरेंद्र धनेश्वर आणि जयपूर-अत्रौली घराण्याच्या युवा गायिका डॉ. राधिका जोशी गुंफणार आहेत.
मैफल शनिवार, दि. 20 मे रोजी सायंकाळी 5:30 वाजता द बेस, एरंडवणे येथे होणार असल्याची माहिती प्रसिद्ध शास्त्रीय गायिका अपर्णा पणशीकर आणि अल्फा इव्हेंटसचे प्रमुख संचालक निखिल जोशी यांनी निवेदनाद्वारे दिली. प्रज्ञा देसाई (व्हायोलिन), लीलाधर चक्रदेव (संवादिनी) आणि प्रणव गुरव (तबला) साथसंगत करणार आहेत.
पंडित अमरेंद्र धनेश्वर हे ग्वाल्हेर घराण्याच्या प्रसिद्ध गायिका नीला भागवत यांचे शिष्य आहेत. पंडित धनेश्वर यांच्या देशविदेशात अनेक मैफली गाजल्या आहेत. एनसीपीए, दादर माटुंगा सेंटर, कर्नाटका संघ, प्रबोधनकार ठाकरे संकुल, मुंबईतील सबर्बन म्युझिक सर्कल, कोलकाता येथील आयसीसीआर सभागृह यासह जयपूर, अहमदाबाद, इंदोर, राजकोट, दिल्ली आणि पुणे येथे त्यांच्या गायन मैफली झाल्या आहेत. संगीतविषयक उपक्रमांबद्दल पंडित धनेश्वर यांनी मिरर, टाईम आऊट, संडे ऑब्झर्व्हर, टाइम्स ऑफ इंडिया या इंग्रजी वृत्तपत्रांसह लोकसत्ता, महाराष्ट्र टाईम्स, महानगर आणि लोकमत या मराठी वृत्तपत्रांमध्ये स्तंभलेखन केले आहे.
युवा पिढीतील आश्वासक गायिका म्हणून डॉ. राधिका जोशी यांच्याकडे पाहिले जाते. त्या पंडित रघुनंदन पणशीकर यांच्या शिष्या असून पद्मभूषण श्रीमती गिरीजादेवी यांच्याकडून त्यांनी ठुमरी, कजरी, होरी, दादरा या उपशास्त्रीय संगीताचे मार्गदर्शन घेतले आहे. देश-परदेशात डॉ. जोशी यांच्या अनेक मैफली झाल्या आहेत. केद्र सरकारकडून त्यांना ललित कलांविषयी शिष्यवृत्ती प्राप्त झालेली आहे.
जाहिरात
अल्फा इव्हेंटस इव्हेंटसतर्फे फेब्रुवारीत संगीत संमेलनाचे आयोजन करण्यात आले होते. ‘बैठक’ मालिकेअंतर्गत वर्षभरात सहा उपक्रम घेतले जाणार आहेत.
‘बैठक’ मैफल सर्वांसाठी खुली आहे.
——————————————
जाहिरात
जाहिरात
जाहिरात
