गोल्डन आय न्यूज नेटवर्क
वाहन विमा नूतनीकरण आणि दंड वसुली प्रक्रिया संलग्न असाव्यात !!
राज्य शासनाकडे प्रस्ताव : मनोज पाटील यांची माहिती
जितो कॉफी टेबल मिटअंतर्गत पदाधिकाऱ्यांशी साधला संवाद !!
पुणे : पुण्यातील वाहतुकीचा प्रश्न गंभीर आहे. वाहतुकीचे नियम मोडणाऱ्यांवर वाहतूक विभागाकडून दंडात्मक कारवाई करण्यात येत आहे. ऑनलाईन प्रणालीद्वारे बजाविण्यात येत असलेल्या दंडाच्या वसुलीचे प्रमाण फारच कमी आहे. वाहनाच्या विमा पॉलिसीचे नूतनीकरण करताना थकीत दंड वसुली होण्यासाठी या दोन्ही प्रक्रिया संलग्न असाव्यात, असा प्रस्ताव राज्य शासनाकडे पाठविण्यात आला आहे, अशी माहिती पुणे शहराचे अतिरिक्त पोलीस आयुक्त (पूर्व विभाग) मनोज पाटील यांनी दिली.
जितो पदाधिकाऱ्यांसमवेत मनोज पाटील.
जैन इंटरनॅशनल ट्रेड ऑर्गनायझेशनतर्फे (जितो) सुहाना कॉफी टेबल मिटअंतर्गत मनोज पाटील यांच्या समवेत संवादात्मक कार्यक्रमाचे आयोजन करण्यात आले होते. बिबवेवाडी येथील जितोच्या कार्यालयात कार्यक्रम झाला. किशोर ओसवाल, प्रसन्न मेहता यांनी पाटील यांच्याशी संवाद साधला. कॉफी टेबल मिटचे संचालक अभिजित डुंगरवाल यांनी उपक्रमाची माहिती देत सूत्रसंचालन केले.
जितो पुणेचे अध्यक्ष इंद्रकुमार छाजेड, दिनेश ओसवाल, राष्ट्रीय अध्यक्ष विजय भंडारी, इंदर जैन, रवींद्र सांकला, राजेश सांकला, अचल जैन, अजय मेहता, चेतन भंडारी, प्रवीण चोरबेले, संतोष जैन, आनंद कटारिया, संजय जैन, मुकेश छाजेड, अनिल भन्साळी, आनंद मेहता, राजेंद्र ललवाणी, राजेंद्र भाठीया, राहुल संचेती, डॉ, सुमतीलाल लोढा, कल्ेपश जैन, करण जैन, नरेंद्र छाजेड, संजय राठोड, महेंद्र सुंदेचा मुथा, लकीशा मर्लेचा, दक्षा जैन, पूनम ओसवाल, प्रियंका परमार, एकता भन्साळी, दिलीप बिनाकिया आदी उपस्थित होते.
व्यावसायिक तक्रारींचे निवारण कसे करावे, गुन्हेगारी प्रतिबंधात्मक उपययोजना कशा असाव्यात, कायदाची अंमलबजाणी काटेकोरपणे होण्यासाठी नागरिकांचे सहकार्य कसे अपेक्षित आहे, शिस्तबद्ध वाहतूक व्यवस्थेची प्रणाली विकसित करताना धोरणे काय असावीत, वाहतूक व्यवस्था सुरळीत करण्याच्या उद्देशाने जगजागृती मोहीम राबविण्याबाबत तसेच वाहतूक व्यवस्थापन यंत्रणेचा अवलंब करताना तंत्रज्ञानाचा सुयोग्य वापर कसा केला जाईल या विषयीची माहिती पाटील यांनी सविस्तरपणे दिली.
पाटील म्हणाले, पुण्यातील वाहतूक व्यवस्थापनात इंटेलिजंट ट्रॅफिक मॅनेजमेंट सिस्टिमसह नव्या युगाच्या तंत्रज्ञानातील कृत्रिम बुद्धिमत्तेचा वापर करून सुधारणा करण्याचा प्रयत्न आहे. पुण्याभोवती रिंगरोड नसल्याने शहारातील रस्त्यांवर मोठ्या प्रमाणावर वाहतुकीचा ताण वाढला आहे. त्यामुळे शहरात वाहतुकीची वारंवार कोंडी होताना दिसते. शहरात वाहनांची संख्या झपाट्याने वाढत आहे. अपुरी सार्वजनिक वाहतूक व्यवस्था तसेच पदपथांवरील अतिक्रमणे याकडेही त्यांनी लक्ष वेधले.
सायबर क्राईमबाबत विचारलेल्य प्रश्नाला उत्तर देताना ते म्हणाले, या गुन्ह्यांचे प्रमाण वाढलेले आहे. फसवणूक होऊ नये म्हणून प्रत्येकाने सावध राहणे गरजेचे आहे. अशी काही घटना घडल्यास 1930 या क्रमांकावर तातडीने संपर्क साधून माहिती दिल्यास नुकसान टाळले जाऊ शकते. शहरातील समस्या सोडविण्यासाठी नागरिकांनी सहकार्य करावे, असे आवाहनही त्यांनी केले.
जितोची सहकार्याची भूमिका..
वाहतुकीचे नियमन, जनजागृती करण्यासाठी जितोच्या माध्यमातून सहकार्य केले जाईल अशी ग्वाही या प्रसंगी पदाधिकाऱ्यांनी दिली. काही व्यावसायिकांना गुंडगिरीचा सामना करावा लागातो, अशा तक्रारीही या प्रसंगी करण्यात आल्या.
