गानवर्धनद्वारे ‘नृत्यभारती’चा सन्मान औचित्यपूर्ण : ज्येष्ठ नृत्यगुरू विदुषी सुजाता नातू यांचे गौरवोद्गार !!
कृ. गो. धर्माधिकारी स्मृती संगीत संवर्धक पुरस्काराने ‘नृत्यभारती’चा गौरव !!
पुणे : ‘नृत्यभारती’ची स्थापना नृत्यांगना व नृत्यगुरू पंडिता रोहिणी भाटे यांनी केली. संस्थेने अमृत महोत्सवी वाटचाल पूर्ण केली आहे. अशा वेळी गानवर्धन संस्थेने नृत्यभारती संस्थेला दिलेला संगीत संवर्धक पुरस्कार अत्यंत औचित्यपूर्ण आहे, असे गौरवोद्गार ज्येष्ठ नृत्यगुरू विदुषी सुजाता नातू यांनी शुक्रवारी येथे काढले.
हिंदुस्थानी शास्त्रीय संगीत क्षेत्रात गेली 44 वर्षे कार्यरत असणाऱ्या गानवर्धन संस्थेचे संस्थापक कै. कृ. गो. धर्माधिकारी यांच्या स्मृतिप्रित्यर्थ देण्यात येणारा संगीत संवर्धक पुरस्कार नृत्यगुरू विदुषी कै. रोहिणीताई भाटे यांच्या नृत्यभारती कथक डान्स अकॅडमीला शुक्रवारी (दि. 10) नातू यांच्या हस्ते प्रदान करण्यात आला. त्यावेळी नातू बोलत होत्या. 21 हजार रुपये, सन्मानचिन्ह असे या पुरस्काराचे स्वरूप आहे.
गानवर्धन आयोजित संगीत संवर्धक पुरस्कार वितरण सोहळ्यात (डावीकडून) दयानंद घोटकर, सविता हर्षे, अमला शेखर, विदुषी सुजाता नातू, रवींद्र दुर्वे.
एस. एम. जोशी सभागृह, नवी पेठ येथे आयोजित कार्यक्रमात ज्येष्ठ नृत्यगुरू विदुषी सुजाता नातू यांच्या हस्ते विविध पुरस्कारांचे वितरण झाले. याप्रसंगी गानवर्धन संस्थेचे अध्यक्ष दयानंद घोटकर, सचिव रवींद्र दुर्वे, पुरस्कार प्रायोजित करणाऱ्या सविता हर्षे, नृत्यभारती संस्थेच्या उपाध्यक्षा अमला शेखर, बाळासाहेब मिरजकर, गोविंदराव बेडेकर आदी मान्यवर व्यासपीठावर उपस्थित होते.
अभिजात संगीताची सेवा करणारे गोविंदराव बेडेकर यांचा अमृतमहोत्सवानिमित्त विशेष सत्कार करण्यात आला.नातू यांनी पंडिता रोहिणी भाटे यांच्या आठवणींना उजाळा दिला. रोहिणीताईंनी प्रतिकूल सामाजिक परिस्थितीत अखंड परिश्रमांनी कथक नृत्य पुण्यात नृत्यभारती संस्थेच्या माध्यमातून रुजवले. नृत्यकलेची जोपासना केली. आज नृत्याचे क्षेत्र विस्तारले आहे, त्यामागे रोहिणीताई आणि नृत्यभारतीचे महत्त्वाचे योगदान आहे,’ असे त्या म्हणाल्या.
नृत्यभारती संस्थेच्या वतीने उपाध्यक्ष अमला शेखर यांनी पुरस्कार स्वीकारला. मनोगत मांडताना त्या म्हणाल्या, गानवर्धन संस्था हे कला, कलाकार आणि रसिक यांना जोडणारे कोंदण आहे. रोहिणीताईंच्या जन्मशताब्दी वर्षानिमित्त त्यांनी स्थापन केलेल्या नृत्यभारतीचा असा गौरव आनंददायी आहे.
बेडेकर यांनीही मनोगत मांडले. सविता हर्षे यांनी पुरस्कारामागील भूमिका स्पष्ट केली. दयानंद घोटकर यांनी प्रास्ताविक केले. कार्याध्यक्ष वासंती ब्रह्मे यांनी सूत्रसंचालन केले.
उत्तरार्धात नृत्यांगना ऋजुता सोमण, प्राजक्ता राज, आभा वांबुरकर, अनुजा क्षीरसागर, वेणू रिसवडकर आणि तुलसी कुलकण यांनी नृत्यआदरांजली सादर केली. यामध्ये ताल त्रिवेणी, ठुमरी, मारवा त्रिवेणी, प्रल्हाद कथा, शेष महेश हे जुगल कीर्तन, अन्योक्ती आणि गणेशवंदना या रचनांचा समावेश होता. या सर्व रचना विदुषी रोहिणी भाटे यांच्या होत्या.
बाळासाहेब मिरजकर यांना वाद्य कारागिर पुरस्कार
ख्यातनाम गायिका बकुळ पंडित व वंदना सेठ पुरस्कृत गानवर्धन संस्थेतर्फे दिला जाणारा वाद्य कारागिर पुरस्कार तंतुवाद्य निर्मिती करणारे बाळासाहेब मिरजकर यांना बहाल करण्यात आला. सन्मानचिन्ह आणि 11 हजार रुपये असे या पुरस्काराचे स्वरूप आहे. मिरजकर म्हणाले, तंतुवाद्य निर्मितीची कला, परंपरा जपणारी आमची सहावी पिढी आहे. आमच्या कार्याची दखल घेतली, याचा आनंद वाटतो.
–—––——————————————————
जाहिरात